އީރާނުގެ ސުކޫލަކަށް އަމާޒުކޮށް އެމެރިކާއިން ދިން ނުރައްކާތެރި ހަމަލާއެއްގައި ގިނަ އަދަދެއްގެ މީހުން މަރުވި ހާދިސާ ހިނގަން މެދުވެރިވި މައިގަނޑު އެއް ސަބަބަކީ އަސްކަރީ އަމާޒުތައް ކަނޑައެޅުމުގައި އެމެރިކާއިން އާޓިފިޝަލް އިންޓެލިޖެންސް (އޭއައި) ވަސީލަތްތަކަށް މާބޮޑަށް ބަރޯސާވުން ކަމަށް ބްލޫމްބާގް ނިއުސްއިން ނެރުނު ތަހުގީގީ ރިޕޯޓެއްގައި ބުނެފިއެވެ.
މި ހާދިސާއާ ގުޅިގެން ބައިނަލްއަގުވާމީ މައިދާނުގައި ބޮޑެތި ފާޑުކިޔުންތަކެއް އެމެރިކާގެ އަސްކަރިއްޔާއަށް ވަނީ ކުރިމަތިވެފައެވެ.
ބްލޫމްބާގުގެ ރިޕޯޓުގައިވާ ގޮތުން، އެމެރިކާގެ އަސްކަރިއްޔާއިން ބޭނުންކުރި އޭއައި ސިސްޓަމުން ދެނެގަތް މައުލޫމާތުތަކަށް އެކަށީގެންވާ ވަރަށް އިންސާނީ ފުރާނައިގެ ރައްކާތެރިކަމަށް ބެލުމެއްނެތި، އަދި އެ މައުލޫމާތުގެ ސައްހަކަން އިންސާނުން މެދުވެރިކޮށް ކަށަވަރުކުރުމެއްނެތި އަމަލުކުރުމުގެ ސަބަބުން، އާންމުން ދިރިއުޅޭ އަދި ކުޑަކުދިން ތައުލީމު ހާސިލުކުރަމުންދިޔަ އިމާރާތެއް ވަނީ އަސްކަރީ އަމާޒެއްގެ ގޮތުގައި ނުބައިކޮށް މާކުކުރެވިފައެވެ. މި ކަމުގެ ސަބަބުން ހަމަލާ އަމާޒުވި ވަގުތު ސުކޫލުގައި ތިބި ގިނަ އަދަދެއްގެ ކުޑަކުދިންނާއި އާންމުން ވަނީ މަރުވެފައެވެ.
މި ހާދިސާއާ ގުޅިގެން އަސްކަރީ ހަނގުރާމަތަކުގައި އާޓިފިޝަލް އިންޓެލިޖެންސް ބޭނުންކުރުމުގެ ނުރައްކާތެރިކަމާ މެދު ދުނިޔޭގެ ސައިންސްވެރިންނާއި އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ދަނީ ކަންބޮޑުވުން ފާޅުކުރަމުންނެވެ. އަދި އޭއައި ޓެކްނޮލޮޖީގެ މައްޗަށް މުޅިން ބަރޯސާވެގެން ނިންމާ އަސްކަރީ ނިންމުންތަކުގެ ސަބަބުން ކުށްނެތް އާންމުންގެ ފުރާނަ ގެއްލިގެންދާ ދިއުން ހުއްޓުވުމަށްޓަކައި، ހަނގުރާމައިގެ މައިދާނުގައި އޭއައި ބޭނުންކުރުމަށް ބައިނަލްއަގުވާމީ ގޮތުން ހަރުކަށި ގަވާއިދުތަކެއް އެކުލަވާލުމަށް އިދާރާތަކުން ދަނީ ގޮވާލަމުންނެވެ.
ރިއެކްޓް އަދި ކޮމެންޓް ކުރެއްވުމަށް